Hönnunar- og prjónasamkeppni Prjónagleðinnar 2023: NÝNOT

Hönnunar- og prjónasamkeppni Prjónagleðinnar 2023

Verkefnið er að endurvinna íslenska lopapeysu og nota hana sem grunnefnivið í nýja nothæfa flík. Þemað er nýnot. Íslensku lopapeysurnar standa alltaf fyrir sínu sem slíkar en þegar þær slitna eða falla ekki lengur í kramið geta þær líka verið spennandi efniviður í nýja hönnun og öðruvísi flík. Íslensk lopapeysa er verndað afurðaheiti samkvæmt MAST og er skilgreind í keppninni á eftirfarandi hátt: Íslensk lopapeysa er handprjónuð í hring úr íslenskum lopa með munstruðu berustykki.

Reglur:

  • Nota skal íslenska lopapeysu í flíkina
  • Flíkinni þarf að vera hægt að klæðast
  • Endurvinna má önnur efni og nota með í flíkina
  • Prjón skal vera megin vinnuaðferð við vinnslu verksins en einnig má nota aðrar handverksaðferðir
  • Verkið verður metið út frá frumleika, notagildi og handverki
  • Myndir af ferlinu og sagan á bak við hönnunina skulu fylgja með, hver var peysan og hver er hún orðin?

Dómnefnd velur 3 efstu sætin. Úrslitin verða kynnt og verðlaun afhent á Prjónagleðinni 2023 og verða verkin til sýnis á hátíðinni. Ístex, Tundra, VatnsnesYarn og Rúnalist gefa glæsileg verðlaun!

Upplýsingar um skil:

Síðasti skiladagur er 15. maí 2023. Verkin skal merkja með dulnefni en nafn, heimilisfang, símanúmer og netfang látið fylgja með í lokuðu umslagi merktu dulnefninu. 

Senda skal fullunnið verk til:

Textílmiðstöðvar Íslands
bt. Svanhildar Pálsdóttur
Kvennaskólanum 
540 Blönduósi

Móttakandi heitir fullum trúnaði við þátttakendur.

Nánari upplýsingar veitir Svanhildur Pálsdóttir svana@textilmidstod.is