Verkefni í vinnslu

THREADs (2024-2027): THREADs ("Textile and Habiliment Reuse for the Environment and NPA Area Development") er samstarfsverkefni styrkt af INTERREG. Samstarfsaðilar eru m.a. Kajaani Háskóli í Finnlandi, sem leiðir verkefnið, Háskólann í Boras, Lulea Miljoresurs AB (Svíþjóð), Western Development Commission og Technological University of the Shannon (Írland), Remiks Husholdning AS (Noregi) og Textílmiðstöð Íslands. Verkefnið hefur yfirskriftina ("Frá hönnun til förgunar"). Í verkefninu er textílúrgangur skoðaður sérstaklega svo sem hvernig söfnun er háttað, hvað verður um úrganginn o.s.frv. Lögð er áhersla á hvort og þá hvernig er hægt að endurvinna og endurnýta textíl.  Jafnframt er skoðað sérstaklega hvað felst í umhverfisvænni textílhönnun. Markhópar eru hagsmunaaðilar í sorpstjórnun, neytendur, hönnuðir, handverksfólk, kennarar og fyrirtæki.

Textílmiðstöð Íslands mun taka þátt í gagnasöfnun tengdri textílsorpi, söfnun og nýtingu þess á Íslandi, skipuleggja kynningarviðburði og vinnustofur í TextílLabi. Upphafsfundur verður á Blönduósi í október 2024.

Tracks4Crafts 2023 - 2026: Samstarfsverkefni sem hlaut styrk úr Horizon 2022 áætlun Evrópusambandsins. Heildarstyrk til Textílmiðstöðvarinnar er 32 milljónir. Að verkefninu standa 16 stofnanir, þar að meðal University of Antwerpen, University Paris I Panthéon-Sorbonne, Association of European Open Air Museums og World Crafts Council Europe. Verkefnið snýst um að þróa nýjar viðskiptahugmyndir með frumkvöðlum og tengja saman menningararfinn og stafrænar aðferðir. Vegna þess að þegar hefur verið unnið mjög vel heppnað hagnýtt rannsóknarverkefni í vefnaði hjá okkur (þar sem áherslan var einmitt á að tengja saman menningararfinn og stafræna tækni) var ákveðið að þáttur Textílmiðstöðvarinnar í rannsóknarþætti verkefnissins snéri að prjóni og útsaumi. Kick-Off fundur var haldinn í Antwerpen í lok mars 2023. https://tracks4crafts.eu/

Fjólublár 2022: Verkefnið Fjólublár er hafið hjá Textílmiðstöð Íslands í samstarfi við Biopol á Skagaströnd og Ístex. Markmiðið er að skapa sjálfbært litunarferli fyrir íslenska ull og einblínir á fjólubláa litarefnisframleiðslu frá bakteríunni Janthinobacterium lividum. Rannsóknir verkefnisins leita eftir því að betrumbæta aðstæður fyrir bakteríuna til að gefa af sér kraftmikinn lit með því að nota ýmis úrgangsefni sem grunn eða miðil fyrir bakteríurnar til að vaxa, og tryggja umhverfislega sjálfbæra framleiðslu litarefnis fyrir textíllitun. Verkefni hlaut styrk úr Uppbyggingarsjóði SSNV 2023. 
 
 

„Uppbygging TextílLabs og -Klasa á Norðurlandi vestra“ 2021 - : Textílmiðstöð Íslands hlaut styrk úr Lóu - nýsköpunarstyrk á landsbyggðinni til verkefnisins í samstarfi við SSNV, BioPol á Skagaströnd, FabLab Sauðárkróki og Ístex árið 2021. Tilgangur klasasamstarfsins að skapa öflugt vistkerfi fyrir hagaðila í textíl af öllu landinu. Boðað var til opins fundar um mótun samstarfs um Textílklasa í janúar 2022. 

Mótun textílklasa hafin á Íslandi | HANDVERK OG HÖNNUN